ASOCIACIÓN DE ALFOMBRAS DE BUEU E COLECTIVO DE ALFOMBRISTAS DAS PONTES

O alfombrismo é unha técnica artística efémera de arte popular, comunmente asociada á ofrendas e ao uso de materiais florais, pero é moito máis. É unha disciplina artística na que se poden utilizar diferentes materiais naturais e cotiás en eventos de temáticas do máis dispares e no que é indispensable o traballo en equipo. As persoas que forman parte destas entidades, insisten continuamente nisto, transmitindo o seu entusiasmo e a necesidade de fomentar esta actividade entre diferentes lugares para garantir a súa supervivencia, que ten solicitada á Unesco a declaración de Ben Inmaterial da Humanidade. A peza realizada o 28 de outubro para o proxecto As Pontes enPEZAS consistiu nunha ofrenda ao mundo da micoloxía, xa que coincidiu  coa reputada Feria de Fungos e Cogomelos das Pontes. Os materiais utilizados nesta alfombra foron do máis diverso: cáscara de arroz (natural e tintada), borra de café (tamizada), conchas de ameixa e berberecho (natural, moída e tintada), terra vexetal, serríns e virutas (tintadas), pétalos de flores (secas) e tulla triturada. Un dos obxectivos desta peza foi o de reunir un grupo de xente das Pontes interesada nesta técnica de arte pública, para que compartisen e adquirisen coñecementos co colectivo artístico de Bueu. Finalmente, a maioría das persoas que participaron tiñan experiencia na confección da alfombra floral das Festas do Carme de As Pontes, e valoraron moi positivamente a iniciativa, tanto polos materiais utilizados como polo innovador das técnicas empregadas. No tocante ao grupo de artistas da Asociación de Bueu, resumiron así a súa vivencia no proxecto As Pontes enPEZAS:

“Este encontro serviunos para estimular a participación veciñal, favorecer as relacións entre alfombristas de Galicia, fomentar a unión dos valores que os caracteriza: a xenerosidade, o voluntariado, o respecto, á diversidade de habilidades, a amizade e a creatividade”.

Asociación Alfombras de Bueu é un grupo de persoas interesadas no alfombrismo, sendo no caso de Bueu, unha técnica artística efémera centenaria. Un dos primeiros logros acadados foi obter a declaración das alfombras de Bueu de Interese Turístico de Galicia, cuxas xestións comezara na década dos 90. Dende 2015 forman parte da Comisión Xestora Internacional de Entidades de Alfombristas de Arte Efémero, organización que permite coñecer casos de “boas prácticas” neste tipo de disciplina a través da organización de congresos en diferentes partes do mundo (Malta, México, Italia, etc.). Esta peza colaborativa foi realizada diante da Casa do Concello, no Parque Municipal “Campo da Feira”

PARA SABER MÁIS