ASPANAES / SONIA SUEIRO

Na primeira edición do As Pontes enPEZAS, os rapaces e rapazas de ASPANAES (Asociación de persoas con trastorno do espectro autista) realizaran unha PEZA efémera con xiz (tiza) coa axuda da pintora Pili Carballeira. Nesta edición quixeron repetir a experiencia, demostrando que queren seguir rachando barreiras, pero esta vez, empregando pintura, para que o seu deseño perdure no tempo. De novo, Pedro, Suso, Pablo, Simón, Iago, Gonzalo, Rebeca, Tania, Saúl, David e Marcos, estiveron moi ben acompañadas/os, desta vez, da artista local Sonia Sueiro.

A PEZA realizada por este conxunto de artistas é un photocall fronte aos xardíns do Campo da Feira cuxa temática son os bicos. Así, este muro transfórmase nun entorno máxico no que se atopa un banco, ideal para sentarse e fotografar os mellores bicos. E todos os bicos valen. Bicos fraternais, bicos na boca ou na meixela, bicos de papá e de mamá, bicos de amizade, bicos de complicidade, bicos de paixón ou primeiros bicos.

O deseño para o photocall foi realizado entre Sonia e os rapaces e rapazas do centro de día e da escola de ASPANAES, que fixeron algunhas sesións de traballo en común, nas que decidiron a temática e como ían a reflexar o que era para eles e elas o amor. O resultado é sen dúbida fascinante, destas pezas que enfeitizan, quedando reflexado un pouco de cada unha das persoas que participou na súa creación.

A muralista novel resume así a súa experiencia: “Pareceume tan bonita a idea, quen non me puiden negar. Fun por Aspanaes antes de facer o deseño para que eles fixeran os seus propios debuxos e como co tema do Covid ao final non puideron pintar, integrei os seus debuxos no deseño. Todo o proceso foi un gran reto do que me levo unha experiencia inesquecible“.

Cristina Rodríguez, profesora en ASPANAES, tamén fai a súa valoración da experiencia: “Sonia soubo plasmar a esencia dos debuxos coma se os fixesen eles. Para nós é unha forma de poñer en valor as fortalezas dos mozos e tirar barreiras abaixo deses que din que non teñen sentimentos“.

Sonia Sueiro, ademais de licenciada en Belas Artes e mestra de secundaria en Educación artística e visual, é unha das impulsoras do proxecto As Pontes enPezas. Ten colaborado con outros artistas, participado en talleres de arte con nenos e nenas, e en exposicións colectivas. Deseñou tamén varios proxectos artísticos na vila.

Como non podía ser de outra forma, a pesar de non poder estar acompañada polos/as rapaces/as debido a crise sanitaria da Covid-19, Sonia deu todo de si para que puidesen sentir a peza tan súa como se estivesen alí. E por se quedasen dúbidas de como facer no banco, incluíu instrucións de uso: “Ponte cómodo/a, bica como ti sabes e comparte este momentazo nas redes sociais #AsPontes #EnPezas”. Así que xa sabes… Que nas Pontes os bicos están moi ricos!

Esta peza colectiva pode visitarse na Avenida de Ferrol 35 (ao lado da Casa do Concello)

PARA SABER MÁIS – Sonia Sueiro