RUBÉN MOLEDO

Rubén Moledo, é un artista pontés dos pés á cabeza, un artista multidisciplinar. A súa paixón desde neno é o graffiti, e acompáñao de aerografías, de debuxos e de boa música, porque para el graffitear muros non é só o seu traballo, tamén é un xeito de expresarse e de entender a vida.

A súa peza está mimetizada de xeito tan creativo que logra integrar unhas hortas urbanas presentes nunha das rúas principais da vila, empregando literalmente as súas mans cheas de arte para darnos á benvida ao seu graffiti, no que tamén colaborou o artista local Iván Gómez, tatuador a tempo completo, debuxante dende sempre e aprendiz de graffitis.

“A arte nas mans” é unha peza que polas características do espazo camúflase coa contorna e que debe observarse, en perspectiva, dende a beirarrúa de enfronte, xusto onde están pintadas no chan, dúas pegadas de pés. A idea do graffiteiro foi recrear un muro roto, no que a través dunha fenda se puidera ver as hortas e as edificacións que hai detrás.

A cidadanía pontesa de Rubén, notouse desde os primeiros traballos de deseño do proxecto As Pontes enPEZAS, no que colaborou activamente co equipo organizador, aportando ideas, ilusión e moi bos momentos.

Cedémoslle a palabra a Rubén para os agradecementos:

“Que a xente do teu pobo che dé a noraboa por un traballo co que desfrutas tanto, non ten prezo. Dende aquí agradecer á xente que se implicou en todo este proxecto e no meu caso, a camuflar entre hortas este muro nunha das avenidas máis transitadas da vila.”

A peza de Rubén Moledo pode desfrutarse na Avenida de Ortigueira nº 78.

PARA SABER MÁIS