Delio Rodríguez
“Festas na honra á Virxe do Carme”
Na histórica Praza do Carme das Pontes, onde a tradición e a modernidade se dan a man, xorde unha nova PEZA que rende homenaxe a unha das celebracións máis entrañables da vila. Delio Rodríguez Ces, o artista vigués que xa deixara a súa pegada na localidade coa representación da lenda das tres fontes irmás, nesta ocasión recrea as festas patronais que o municipio mantén vivas dende 1741.
A obra, situada na medianeira do grupo de vivendas Calvo Sotelo, destaca pola súa integración nun contorno humilde pero cargado de significado. É precisamente nesta contorna onde cobra máis sentido a representación dunhas festas de marcado carácter popular, que durante case tres séculos uniron á veciñanza nunha celebración única en Galicia: As Pontes é dos únicos municipios do interior que renden culto á Virxe do Carme, tradicionalmente venerada nas vilas mariñeiras.
O artista soubo captar a esencia desta singularidade a través dunha paleta de cores vivas e alegres que reflicten o espírito festivo da celebración. Na súa composición inclúe multitude de elementos icónicos como a pequena Capela do do Carme, as tradicionais alfombras florais coas que se engalana a praza diante da capela nesa festividade, os fogos de artificio que iluminan as noites de festa, a gastronomía típica cos manteigados e os polvoróns, as figuras da pandereteira e o gaiteiro que amenizan as celebracións e as xentes en festa que dan vida ás rúas da vila.
Esta aparente contradición entre a importancia da festividade e a sinxeleza do seu templo reflicte o carácter auténtico e popular da celebración, lonxe de fastos, pero rica en tradición e fervor popular. A obra de Delio trasládanos a esas xornadas de xullo nas que a vila se viste de festa para honrar á súa patroa, nunha celebración que naceu hai case tres séculos e que permanece viva no corazón da xente das Pontes.
O mural, que ocupa uns 56 metros cadrados na fachada dun edificio de vivendas sociais que no seu día eran coñecidas como “Casas Baratas”, convive harmoniosamente co xa icónico mural dedicado ao mítico bandoleiro Toribio, creando un diálogo visual entre diferentes capítulos da historia local.
Delio Rodríguez, licenciado en Belas Artes pola Universidade de Vigo e recoñecido coa beca de produción mural da Escola de Artes Plásticas de Guadalajara (México) e o Premio de Intervención Mural da Universidade de Vigo, amosou unha vez máis a súa capacidade para conectar coa identidade local. Como el mesmo relata, o proxecto céntrase na celebración anual máis importante para a comunidade local, buscando transmitir a alegría e o colorido dunhas xornadas de confraternización arredor dunha tradición centenaria.
Esta peza de autor está situada na Avenida de Ferrol, fronte a Capela do Carme. Ver ubicación.
+ info:
