As Pontes enPEZAS concíbese como unha iniciativa de rexeneración urbana co fin de transformar entornos e espazos descoidados, en espazos vivos e nos que desfrutar de pezas de arte ao aire libre.

Para logralo, apoiarémonos tanto nas intervencións de artistas comprometidos coa realidade social e cultural das Pontes, como na implicación da poboación neste proceso de rexeneración. Queremos que As Pontes enPEZAS permita relacións humanas baseadas na cooperación, na diversidade, a convivencia e a inclusión social, ao tempo que estimule habilidades artísticas e creativas na nosa comunidade.

E os nomes importan. Co de As Pontes enPEZAS quixemos dar conta do seu carácter plural e diverso, xa que unha PEZA no mundo da arte fai referencia á: pintura, a escultura, a arquitectura, a poesía, a música ou ao teatro. Deste xeito, dase cabida a todo tipo de expresións artísticas: o muralismo, as instalacións con fíos (yarnbombing), o alfombrismo, a fotografía, as plantillas (stencil), os mosaicos ou o graffiti urbano.

As Pontes enPEZAS tamén fai fincapé na importancia da suma e da unión de cada fragmento para contruír un TODO colectivo. No primeiro ano levaronse a cabo 13 obras, e agora… PEZA a PEZA queremos facer da nosa vila: un museo a ceo aberto.