As Pontes enPEZAS concíbese como unha iniciativa de dinamización social cuxo fin é o de transformar as rúas, as prazas e os parques da vila das Pontes, en espazos creativos nos que desfrutar de pezas de arte ao aire libre.

Para logralo, apoiámonos tanto nas intervencións de artistas comprometidos coa realidade social e cultural das Pontes, como na implicación da poboación neste proceso de rexeneración. Queremos que As Pontes enPEZAS permita relacións humanas baseadas na cooperación, na diversidade, a convivencia e a inclusión social, ao tempo que estimule habilidades artísticas e creativas na nosa comunidade.

E os nomes importan. Co de As Pontes enPEZAS quixemos dar conta do seu carácter plural e diverso, xa que unha PEZA no mundo da arte fai referencia á pintura, a escultura, a arquitectura, a poesía, a música ou ao teatro. Deste xeito, dáse cabida a todo tipo de expresións artísticas: o muralismo, as instalacións con fíos (yarnbombing), o alfombrismo, a fotografía, as plantillas (stencil), os mosaicos ou o graffiti urbano.

As Pontes enPEZAS tamén fai fincapé na importancia da suma e da unión de cada fragmento para construír un TODO colectivo. No primeiro ano leváronse a cabo 13 obras, e agora… PEZA a PEZA queremos converter a nosa vila nun MUSEO PÚBLICO a ceo aberto.